시편 28편 Vulgata Clementina
Vulgata Clementina · 라틴어 · 시편 (Psalms) · 11절
- 1 Psalmus David, in consummatione tabernaculi. Afferte Domino, filii Dei, afferte Domino filios arietum.
- 2 Afferte Domino gloriam et honorem ; afferte Domino gloriam nomini ejus ; adorate Dominum in atrio sancto ejus.
- 3 Vox Domini super aquas ; Deus majestatis intonuit : Dominus super aquas multas.
- 4 Vox Domini in virtute ; vox Domini in magnificentia.
- 5 Vox Domini confringentis cedros, et confringet Dominus cedros Libani :
- 6 et comminuet eas, tamquam vitulum Libani, et dilectus quemadmodum filius unicornium.
- 7 Vox Domini intercidentis flammam ignis ;
- 8 vox Domini concutientis desertum : et commovebit Dominus desertum Cades.
- 9 Vox Domini præparantis cervos : et revelabit condensa, et in templo ejus omnes dicent gloriam.
- 10 Dominus diluvium inhabitare facit, et sedebit Dominus rex in æternum.
- 11 Dominus virtutem populo suo dabit ; Dominus benedicet populo suo in pace.
- 📚 Vulgata Clementina 책 목록
- 개역개정판 (1998)로
- 개역한글판 (1961)로
- 표준새번역 (1993)로
- King James Version로
- KJV 와 나란히
- 🌐 다른 언어·판
Vulgata Clementina — getbible.net(CrossWire SWORD 모듈)에서 가져옴 · 라이선스: 공개 도메인 (Public Domain) · 출처 ↗