잠언 2장 King Jems Pisin Baibel

1. 1 ¶ Pikinini man bilong mi, sapos yu bai kisim ol toktok bilong mi, na haitim ol strongpela tok bilong mi wantaim yu,
2. 2 Inap long yu putim ia bilong yu long save tru, na putim bel bilong yu bilong kisim gutpela save,
3. 3 Yes, sapos yu singaut long kisim save, na yu litimapim nek bilong yu long gutpela save,
4. 4 Sapos yu painim em olsem silva, na yu painim em olsem long ol samting i dia tru i stap hait,
5. 5 Orait bai yu kisim save long pret long BIKPELA, na painim pinis save long God.
6. 6 Long wanem, BIKPELA i givim save tru. Save na gutpela save i kam long maus bilong Em.
7. 7 Em i holim strongpela save tru bilong givim ol stretpela man. Em i wanpela plang bilong han long ol husat i wokabaut stret.
8. 8 Em i holimpas ol liklik rot bilong kot, na Em i lukautim i stap rot bilong ol seint bilong Em.
9. 9 Orait bai yu kisim save long stretpela pasin, na kot, na stretpela kot tru, yes, olgeta wan wan gutpela liklik rot.
10. 10 ¶ Taim save tru i go insait long bel bilong yu, na save i gutpela long tewel bilong yu,
11. 11 Stretpela tingting bai lukautim yu gut, na gutpela save bai holimpas yu,
12. 12 Bilong kisim bek yu long rot bilong man nogut, long man husat i mekim ol bikhet toktok,
13. 13 Husat i lusim ol liklik rot bilong stretpela pasin, bilong wokabaut long ol rot bilong tudak,
14. 14 Husat i wokim amamas tru long mekim pasin nogut, na i gat gutpela amamas long bikhet pasin bilong ol man nogut,
15. 15 Husat ol rot bilong ol i krungut, na ol i bikhet long ol rot bilong ol,
16. 16 Bilong kisim bek yu long han bilong narakain meri, yes, long han bilong ausait meri husat i tok gris wantaim ol toktok bilong en,
17. 17 Husat i givim baksait long stia bilong em taim em i yangpela, na em i lusim tingting long kontrak bilong God bilong em.
18. 18 Long wanem, haus bilong em em i wok long go daun long dai, na ol liklik rot bilong em i go long ol daiman.
19. 19 I no gat wanpela husat i go long em i kam bek gen, na tu ol i no holim ol liklik rot bilong laip.
20. 20 Inap long yu ken wokabaut long rot bilong ol gutpela man, na holimpas ol liklik rot bilong ol stretpela man.
21. 21 Long wanem, ol stretpela man bai sindaun long dispela hap, na ol man i inap tru bai stap yet long en.
22. 22 Tasol ol bai rausim olgeta ol man nogut long dispela graun, na ol bai kamautim long graun ol man i kalapim lo.

• 📚 King Jems Pisin Baibel 책 목록
• 개역개정판 (1998)로
• 개역한글판 (1961)로
• 표준새번역 (1993)로
• King James Version로
• KJV 와 나란히
• 🌐 다른 언어·판

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗