로그인

시편 78편 King Jems Pisin Baibel

King Jems Pisin Baibel · 톡피신어 · 시편 (Psalms) · 72절

🖍 이 판을 읽기 도구로 읽기 📖 무료성경
  1. 1 ¶ O ol manmeri bilong mi, yupela i mas harim lo bilong mi. Yupela i mas putim ol ia bilong yupela long ol tok bilong maus bilong mi.
  2. 2 Bai mi opim maus bilong mi long autim tok piksa. Bai mi autim ol tok tudak bilong bipo,
  3. 3 Em mipela i bin harim na mipela i save, na ol papa bilong mipela i bin tokim mipela.
  4. 4 Bai mipela i no haitim ol long ol pikinini bilong ol. Long lain manmeri bai i kamap bihain bai mipela i soim ol samting bilong litimapim nem bilong BIKPELA. Na bai mipela i soim strong bilong Em, na ol wok bilong Em i save winim tingting. Em i bin wokim ol dispela.
  5. 5 Long wanem Em i bin sanapim wanpela testimoni long Jekop na makim wanpela lo long Israel. Em i bin givim strongpela tok long dispela long ol tumbuna papa bilong mipela, bai ol i ken toksave long ol long ol pikinini bilong ol.
  6. 6 Olsem na lain manmeri bai i kamap i ken save long ol, yes ol pikinini bai i kamap ol i ken save. Na ol i ken kirap na tokaut long ol long ol pikinini bilong ol.
  7. 7 Bai ol i ken bilip na wet long God. Na ol i no ken lusim tingting long ol wok bilong God, nogat. Tasol ol i ken holimpas long ol strongpela tok bilong Em.
  8. 8 Na ol i no ken stap olsem ol tumbuna papa bilong ol, ol i lain manmeri i bikhet na i sakim tok. Ol i lain manmeri i no bin mekim bel bilong ol i stap stret. Na spirit bilong ol i no bin i stap strong wantaim God.
  9. 9 ¶ Ol pikinini bilong Ifraim i karim i go ol samting bilong pait na i karim i go ol banara. Long de bilong pait ol i bin tanim i go bek.
  10. 10 Ol i no bin holimpas long kontrak bilong God. Na ol i tok nogat long wokabaut long lo bilong Em.
  11. 11 Na ol i lusim tingting long ol wok bilong Em na ol bikpela wok i winim tingting Em i bin soim ol.
  12. 12 Long ai bilong ol tumbuna papa bilong ol, long hap graun bilong Isip, long ples gras bilong Soan, Em i bin mekim ol samting i mekim ol i tingting planti.
  13. 13 Em i brukim solwara na Em i mekim ol i wokabaut i go namel. Na Em i mekim ol wara i sanap olsem liklik maunten.
  14. 14 Long tulait Em i putim klaut bilong soim rot long ol tu. Na long olgeta nait, Em i soim rot long lait bilong paia.
  15. 15 Long ples i no gat man, Em i bin brukim ol bikpela ston na givim wara long ol bilong dring, olsem em i kam long ol ples daunbilo tru.
  16. 16 Na tu Em i bringim ol liklik wara i kamaut long bikpela ston, na Em i mekim ol wara i ran i go daun olsem ol bikwara.
  17. 17 Na ol i mekim sin moa yet long Em taim ol i kirapim belhat bilong Man i Antap olgeta long ples i no gat man.
  18. 18 Na long bel bilong ol, ol i traim God, taim ol i askim mit bilong inapim laik bilong bel bilong ol.
  19. 19 Yes, ol i bin tok birua long God. Ol i bin tok, Ating God inap redim tebol long ples i no gat man, a?
  20. 20 Harim, Em i bin paitim bikpela ston, olsem na ol wara i ran i kam, na ol liklik wara i pulap na kapsait. Ating Em inap givim bret tu? Ating Em inap redim mit bilong ol manmeri bilong En?
  21. 21 Olsem na BIKPELA i harim dispela, na Em i belhat. Orait Em i laitim paia na salim i go long Jekop. Na tu belhat i kamap birua long Israel.
  22. 22 Long wanem ol i no bin putim bilip bilong ol long God, na ol i no bin putim bilip bilong ol long kisim bek bilong Em.
  23. 23 Tasol pastaim Em i bin givim strongpela tok long ol klaut long antap, na Em i bin opim ol dua bilong heven, .
  24. 24 Na Em i bin salim mana i kam daun long ol olsem ren, bai ol i ken kaikai. Na Em i bin givim sampela bilong wit samting bilong heven long ol.
  25. 25 Man i bin kaikai ol kaikai bilong ol ensel. Na Em i bin salim mit i kam long ol inap ol i pulap.
  26. 26 Em i bin mekim win i kam long hap sankamap na em i win i stap long heven. Na long pawa bilong En, Em i bin bringim win i kam long saut.
  27. 27 Na tu Em i bin salim mit i pundaun long ol olsem das, na ol pisin i gat gras i pundaun long ol olsem wesan bilong solwara.
  28. 28 Na Em i larim dispela i pundaun namel long kem bilong ol, nabaut long ol haus bilong ol.
  29. 29 Olsem na ol i bin kaikai na i pulap tru. Long wanem Em i bin givim laik bilong ol yet long ol.
  30. 30 Ol i no tanim i go na lusim samting bel bilong ol i kirap long en. Tasol taim mit bilong ol i stap yet long ol maus bilong ol,
  31. 31 Orait belhat tru bilong God i kam antap long ol. Na Em i kilim i dai ol man bilong ol i patpela moa, na Em i paitim na daunim ol man bilong Israel, Em i bin makim ol.
  32. 32 Dispela olgeta samting i bin kamap, tasol ol i mekim sin yet. Na ol i no bin bilipim ol bikpela wok bilong Em i winim tingting.
  33. 33 Olsem na Em i bin bagarapim olgeta ol de bilong ol long pasin nating, na ol yia bilong ol long hevi.
  34. 34 Taim Em i bin kilim ol i dai, orait ol i wok long painim Em. Na ol i bin kam bek na mekim askim long God kwiktaim.
  35. 35 Na ol i bin tingting gen long God em i bikpela ston bilong ol na God antap Em i Man bilong baim bek ol.
  36. 36 Tasol long maus bilong ol, ol i bin grisim Em. Na long ol tang bilong ol, ol i bin tok giaman long Em.
  37. 37 Long wanem, bel bilong ol i no stap stretpela wantaim Em, na tu ol i no sanap strong long bihainim kontrak bilong Em.
  38. 38 Tasol Em i pulap long sori na i lusim sin nogut bilong ol. Na Em i no bin bagarapim ol. Yes, planti taim Em i tanim belhat bilong En i lusim ol. Na Em i no bin kirapim olgeta belhat tru bilong En.
  39. 39 Long wanem Em i bin holim tingting long ol i man tasol. Ol i wanpela win i kam i go pinis, na i no kam bek gen.
  40. 40 ¶ Planti taim ol i bin kirapim belhat bilong Em long ples i no gat man! Na ol i bin givim bel hevi long Em long ples wesan!
  41. 41 Yes, ol i bin tanim i go bek, na ol i bin traim God na pasim dispela Wanpela i Holi bilong Israel.
  42. 42 Ol i no bin tingim gen han bilong Em o de Em i bin tekewe ol long han bilong birua.
  43. 43 Ol i no bin tingim gen olsem wok bilong Em long wokim ol mak bilong Em long Isip, na ol bikpela wok bilong Em i save winim tingting long ples kunai bilong Soan.
  44. 44 Na Em i bin tanim ol bikwara bilong ol i kamap blut. Na Em i bin tanim ol wara i stap antap tru bilong ol bai ol i no inap dring.
  45. 45 Em i bin salim olkain lang namel long ol, na ol lang i bin daunim ol. Na Em i bin salim ol rokrok, na ol rokrok i bin bagarapim ol.
  46. 46 Na tu Em i bin givim kaikai bilong ol long ol katapila, na ol samting ol i bin hatwok long kamapim Em i bin givim long grasop.
  47. 47 Em i bin salim ston ais i kam na bagarapim ol rop diwai bilong ol. Na ais bilong moningtaim i bagarapim ol diwai sikamoa bilong ol.
  48. 48 Em i bin givim ol bulmakau bilong ol long dispela ston ais tu. Na Em i bin givim ol lain sipsip bilong ol long ol hatpela lait i sut i kam long klaut i pairap.
  49. 49 Em i bin tromoi strong bilong belhat, na belhat tru, na bel nogut, na bikpela hevi bilong Em i go long ol, taim Em i salim ol ensel nogut i kam namel long ol.
  50. 50 Em i bin wokim rot long belhat bilong En. Em i no bin holim bek tewel bilong ol long i dai pinis, nogat. Tasol Em i bin givim laip bilong ol long bagarap long sik.
  51. 51 Na Em i bin paitim olgeta namba wan pikinini long Isip, em i nambawan bilong strong bilong ol long ol haus sel bilong Ham.
  52. 52 Tasol Em i bin mekim ol manmeri bilong Em yet i go ausait olsem ol sipsip. Na Em i bin stiaim ol i go long ples i no gat man olsem lain sipsip.
  53. 53 Na Em i bin i go pas long ol, na ol i stap gut, olsem na ol i no pret. Tasol solwara i karamapim ol birua bilong ol.
  54. 54 Na Em i bin bringim ol i kam long arere bilong ples holi bilong En, yes, long dispela maunten han sut bilong En i bin baim.
  55. 55 Na tu Em i bin rausim i go ol haiden long pes bilong ol. Na samting ol pikinini i kisim long papa Em i bin metaim na skelim long ol. Na Em i bin mekim ol lain bilong Israel i sindaun i stap long ol haus sel bilong ol.
  56. 56 Tasol ol i bin traim God i antap olgeta, na ol i bin kirapim belhat bilong Em. Na ol i no bin holimpas long ol testimoni bilong Em, nogat.
  57. 57 Tasol ol i bin tanim i go bek na mekim pasin yu no inap bilip long ol olsem ol papa bilong ol. Ol i bin tanim i go long narapela hap, olsem banara i save giaman.
  58. 58 Long wanem ol i bin wokim ol ples antap na kirapim belhat bilong Em. Na long ol i wokim ol piksa god bilong ol, ol i bin kirapim Em long jeles pasin.
  59. 59 Taim God i harim dispela, Em i belhat tru. Na Em i bin holim strongpela tingting long tromoi Israel.
  60. 60 Olsem na Em i bin lusim haus sel holi bilong Sailo, em dispela haus sel Em i bin putim namel long ol man.
  61. 61 Na Em i givim strong bilong En i go long kalabus. Na Em i bin givim glori bilong En long han bilong birua.
  62. 62 Em i bin givim ol manmeri bilong En long bainat tu. Na Em i bin stap belhat tru long ol manmeri Em i bin kisim.
  63. 63 Paia i bin bagarapim olgeta ol yangpela man bilong ol. Na ol i no bin givim ol yangpela meri bilong ol long marit.
  64. 64 Bainat i bin mekim ol pris bilong ol i pundaun bilong i dai. Na ol meri bilong ol dispela man i dai pinis ol i no bin mekim krai sori.
  65. 65 Long dispela taim BIKPELA i bin kirap olsem man i kirap long slip, na olsem strongpela man i bikmaus taim em i dring wain.
  66. 66 Na Em i bin paitim ol birua bilong En long ol hap i stap baksait. Em i bin mekim ol i kisim sem oltaim.
  67. 67 Na moa tu Em i bin tok nogat long haus sel bilong Josep. Na Em i no bin makim lain bilong Ifraim, nogat.
  68. 68 Tasol Em i bin makim lain bilong Juda, em maunten Saion, na Em i laikim tru dispela hap.
  69. 69 Na Em i bin wokim haus holi bilong En olsem ol haus bilong ol king i antap, na olsem dispela graun Em i bin sanapim bilong oltaim oltaim.
  70. 70 Em i bin makim Devit tu, em i wokboi bilong En. Devit i bin stap long ol banis bilong sipsip na Em i kisim em i kam.
  71. 71 Devit i bin wok long bihainim ol sipsip meri i gat pikinini long bel. Na Em i bin bringim em i kam bilong givim kaikai long Jekop, lain manmeri bilong En, na long Isrel, lain manmeri Em i bin kisim long han bilong papa.
  72. 72 Olsem na em i bin givim kaikai long ol bilong bihainim pasin i stretpela olgeta bilong bel bilong en. Na long han bilong en i gat gutpela save, em i bin soim rot long ol.

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗