로그인

시편 33편 King Jems Pisin Baibel

King Jems Pisin Baibel · 톡피신어 · 시편 (Psalms) · 22절

🖍 이 판을 읽기 도구로 읽기 📖 무료성경
  1. 1 ¶ O yupela stretpela man, yupela i mas amamas tru long BIKPELA. Long wanem pasin bilong litimapim nem bilong Em em i orait tru bilong stretpela manmeri i mekim.
  2. 2 Yupela i mas litimapim nem bilong BIKPELA long musik bilong harp. Yupela i mas singim ol song long Em long narapela kain harp na samting olsem gita i gat 10‑pela string.
  3. 3 Yupela i mas singim nupela song long Em. Yupela i mas pilai musik long gutpela save na bikpela nois.
  4. 4 Long wanem, tok bilong BIKPELA em i stretpela. Na Em i mekim olgeta wok bilong En long pasin i tru.
  5. 5 Em i laikim tru stretpela pasin na stretpela kot. Dispela graun i pulap long gutpela pasin bilong BIKPELA.
  6. 6 BIKPELA i bin wokim ol heven long tok bilong Em. Na long win bilong maus bilong En, Em i bin wokim olgeta bilong planti samting i stap long ol.
  7. 7 Em i save bungim ol wara bilong solwara olsem wanpela hip. Em i save putim ol ples daun long ol haus bilong putim samting.
  8. 8 Larim olgeta hap bilong dispela graun i stap pret long BIKPELA. Larim olgeta manmeri i stap long dispela graun i guria long Em.
  9. 9 Long wanem Em i bin toktok, na dispela i kamap. Em i bin givim strongpela tok, na dispela i sanap strong.
  10. 10 BIKPELA i mekim ol tok helpim bilong ol haiden i kamap samting nating. Em i mekim ol tingting bilong ol manmeri i no inap.
  11. 11 Tok helpim bilong BIKPELA i sanap oltaim oltaim. Ol tingting bilong bel bilong En i sanap inap long taim bilong olgeta lain manmeri.
  12. 12 ¶ Blesing i stap long kantri, God bilong ol em i BIKPELA, na long lain manmeri Em i bin makim bilong Em yet olsem samting man i kisim long Papa.
  13. 13 BIKPELA i stap long heven na i lukluk daun. Em i lukim olgeta pikinini man bilong ol man.
  14. 14 Long ples Em i stap long en, Em i lukluk long olgeta manmeri i stap long dispela graun.
  15. 15 Em i wokim ol bel bilong ol i wankain. Em i tingim na skelim olgeta wok bilong ol.
  16. 16 Planti tru soldia bilong ami i no inap kisim bek wanpela king. Planti strong i no inap helpim wanpela man i gat bikpela strong.
  17. 17 Hos em i samting nating bilong helpim man i stap gut. Na tu bai em i no kisim bek wanpela man long bikpela strong bilong em.
  18. 18 Lukim, ai bilong BIKPELA i stap antap long ol husat i pret long Em, antap long ol husat i hop long sori bilong Em,
  19. 19 Bilong tekewe tewel bilong ol long i dai pinis, na bilong holimpas ol long i stap laip long taim bilong bikpela hangre.
  20. 20 Tewel bilong mipela i save wet bilong lukim BIKPELA. Em i stap helpim bilong mipela na hap plang bilong mipela.
  21. 21 Long wanem, bel bilong mipela bai amamas tru long Em, long wanem mipela i putim bilip bilong mipela long nem holi bilong Em.
  22. 22 Larim sori bilong Yu, O BIKPELA, stap antap long mipela, bilong bihainim olsem mipela i hop long yu.

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗