로그인

시편 106편 King Jems Pisin Baibel

King Jems Pisin Baibel · 톡피신어 · 시편 (Psalms) · 48절

🖍 이 판을 읽기 도구로 읽기 📖 무료성경
  1. 1 ¶ Yupela i mas litimapim BIKPELA. O, givim tenkyu long BIKPELA. Long wanem Em i gutpela. Long wanem, sori bilong Em i stap strong yet oltaim oltaim.
  2. 2 Husat i ken tokaut long ol strongpela wok bilong BIKPELA? Husat inap tokaut long olgeta biknem bilong Em?
  3. 3 Blesing i stap long ol man i holimpas long stretpela kot na long man i mekim stretpela pasin olgeta taim.
  4. 4 O BIKPELA, Yu mas tingim gen mi long pilim bilong laikim Yu bin karim i go long ol manmeri bilong Yu. Yu mas lukautim mi long kisim bek bilong Yu.
  5. 5 Olsem na mi ken lukim lain Yu bin makim em i stap gut. Na bai mi ken amamas long pasin belgut bilong kantri bilong Yu. Na bai mi ken glori wantaim lain manmeri Papa i bin givim Yu.
  6. 6 ¶ Mipela i bin mekim sin wantaim ol papa bilong mipela. Mipela i bin mekim sin nogut. Mipela i bin mekim pasin i nogut tru.
  7. 7 Ol tumbuna papa bilong mipela i no bin save gut long ol wok i save winim tingting Yu bin mekim long Isip. Ol i no bin tingim gen ol sori bilong Yu i planti tru. Tasol ol i bin kirapim belhat bilong Em long solwara, yes, long Retsi.
  8. 8 Tasol Em i bin kisim bek ol bilong litimapim nem bilong En, bai Em i ken mekim ol manmeri i save long strongpela pawa bilong En.
  9. 9 Em i bin hatim Retsi tu, na em i kamap drai. Olsem na Em i go pas long ol long ol ples daunbilo olsem long ples i no gat man.
  10. 10 Na Em i bin kisim bek ol long han bilong man i no laikim tru ol na baim bek ol long han bilong birua.
  11. 11 Na ol wara i karamapim ol birua bilong ol. I no gat wanpela bilong ol i stap moa.
  12. 12 Nau ol i bilipim ol tok bilong Em. Ol i bin singim song long biknem bilong Em.
  13. 13 ¶ Kwiktaim ol i lusim tingting long ol wok bilong Em. Ol i no bin wet bilong kisim tok helpim bilong Em, nogat.
  14. 14 Tasol long ples i no gat man, bel bilong ol i kirap planti tumas, na long ples wesan ol i bin traim God.
  15. 15 Na samting ol i bin askim, Em i bin givim ol. Tasol Em i salim pasin bilong i stap bun nating i go long tewel bilong ol.
  16. 16 Long kem ol i bin mangal tu long Moses wantaim Aron, dispela seint bilong BIKPELA.
  17. 17 Graun i bin op na daunim Detan na i bin karamapim lain manmeri bilong Abiram.
  18. 18 Na paia i lait namel long lain manmeri bilong ol. Paia i bin kukim ol man i nogut tru.
  19. 19 Long Horep ol i bin wokim pikinini bulmakau na lotuim dispela piksa ol i wokim long paia i kukim gol.
  20. 20 Long dispela ol i bin senisim glori bilong ol na mekim i kamap olsem bulmakau i save kaikai gras.
  21. 21 Ol i bin lusim tingting long God, Peman bilong kisim bek ol, Em i bin mekim ol bikpela samting long Isip,
  22. 22 Na ol wok i antap tumas long hap graun bilong Ham, na ol samting bilong pretim man klostu long Retsi.
  23. 23 Olsem na Em i bin tok, Em i laik bagarapim ol. Tasol Moses, man Em i bin makim, em i sanap long pes bilong Em namel long Em na ol manmeri, bilong tanim belhat tru bilong Em i go. Nogut Em i bagarapim ol.
  24. 24 Yes, ol i bin tingim dispela naispela hap graun em i samting nating. Ol i no bin bilipim tok bilong Em, nogat.
  25. 25 Tasol long ol haus sel bilong ol, ol i bin tok baksait. Na ol i no bin harim gut nek bilong BIKPELA.
  26. 26 Olsem na Em i litimapim han bilong En na birua long ol bilong bagarapim ol long ples i no gat man,
  27. 27 Na bilong bagarapim ol tumbuna pikinini bilong ol tu namel long ol kantri, na bilong rausim ol i go nabaut long ol hap graun.
  28. 28 Ol i bin pasim ol yet wantaim Beal-pior. Na ol i bin kaikai ol ofa bilong ol daiman.
  29. 29 Olsem na ol i bin kirapim belhat bilong Em long ol samting ol i kamapim. Na bikpela sik i bin i kamap namel long ol.
  30. 30 Orait Finias i sanap na i wokim stretpela kot. Olsem na dispela bikpela sik i pinis.
  31. 31 Na God i makim dispela olsem stretpela pasin long nem bilong em i go long olgeta lain manmeri bilong em i kamap bihain inap long oltaim oltaim.
  32. 32 Long ol wara bilong tok pait tu ol i bin mekim Em i belhat. Olsem na nogut i kamap long Moses long pasin bilong ol.
  33. 33 Long wanem ol i bin kirapim spirit bilong em, olsem long maus bilong en, em i bin mekim toktok i kam long belhat.
  34. 34 ¶ Ol i no bin bagarapim olgeta ol kantri, em ol lain God i bin tok strong long ol long bagarapim.
  35. 35 Tasol ol i bin abusim ol yet wantaim ol haiden na kisim save long ol wok bilong ol.
  36. 36 Na ol i bin mekim wok long ol god giaman bilong ol. Na ol dispela god giaman i bin stap wanpela umben bilong pasim ol.
  37. 37 Yes, ol i bin sakrifaisim ol pikinini man bilong ol na ol pikinini meri bilong ol long ol spirit nogut.
  38. 38 Na ol i kapsaitim blut i no bin mekim rong, yes blut bilong ol pikinini man bilong ol na ol pikinini meri bilong ol, ol i bin sakrifaisim ol long ol god giaman bilong Kenan. Na long dispela blut, ol i mekim dispela graun i kamap doti.
  39. 39 Long dispela ol i bin kamap doti long ol wok bilong ol yet. Na ol i bin pamuk wantaim ol samting ol yet i kamapim.
  40. 40 Olsem na belhat tru bilong BIKPELA i bin paia long ol manmeri bilong Em, inap long Em i tingim lain manmeri Papa i bin givim Em yet ol i sting tru.
  41. 41 Na Em i bin givim ol long han bilong ol haiden. Na ol man i no laikim tru ol, ol i bosim ol.
  42. 42 Ol birua bilong ol i bin givim hevi long ol tu. Na ol i daunim ol aninit long han bilong ol.
  43. 43 Planti taim Em i bin kisim bek ol. Tasol ol i bin kirapim Em long tok helpim bilong ol. Na Em i bin daunim ol, long wanem ol i mekim sin nogut.
  44. 44 Tasol Em i bin lukim hevi bilong ol, taim Em i harim krai bilong ol.
  45. 45 Na Em i tingim gen kontrak bilong En bilong helpim ol, na Em i tanim bel bilong bihainim ol sori bilong Em i planti tru.
  46. 46 Na tu ol man i bin karim ol i go kalabus, Em i bin mekim ol i sori long ol.
  47. 47 O BIKPELA na God bilong mipela, Yu mas kisim bek mipela, na bungim mipela long lusim hap i namel long ol haiden, long mipela i ken givim tok tenkyu long nem holi bilong Yu na amamas bikmaus long biknem bilong Yu.
  48. 48 Blesing i stap long BIKPELA, em God bilong Israel, i stat long oltaim oltaim na i go long oltaim oltaim. Na olgeta manmeri i tok, Amen. Yupela litimapim nem bilong BIKPELA.

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗