로그인

마가복음 6장 King Jems Pisin Baibel

King Jems Pisin Baibel · 톡피신어 · 마가복음 (Mark) · 56절

🖍 이 판을 읽기 도구로 읽기 📖 무료성경
  1. 1 ¶ Na Em i go ausait long dispela ples, na kam insait long hap bilong Em Yet. Na ol disaipel bilong Em i bihainim Em.
  2. 2 Na taim de sabat i kam pinis, Em i stat long skulim ol manmeri insait long sinagog. Na planti, taim ol i harim Em, i kirap nogut, i spik, Dispela Man i bin kisim ol dispela samting long we? Na dispela save tru God i givim Em em wanem, inap long yes, ol kain strongpela wok olsem Em i wokim long tupela han bilong Em?
  3. 3 Ating i yes long dispela em i kamda, pikinini man bilong Maria, brata bilong Jems, na Joses, na bilong Juda, na Saimon? Na ating i yes long ol susa bilong Em i stap hia wantaim yumi? Na bel bilong ol i bagarap long Em.
  4. 4 Tasol Jisas i tokim ol, Profet i no sot olgeta long ona, long hap bilong em yet tasol, na namel long ol kandre bilong em, na insait long hauslain bilong em yet.
  5. 5 Na Em i no inap wokim strongpela wok long dispela hap, Em i putim tupela han bilong Em antap long wan wan bilong ol manimeri i sik tasol, na oraitim ol.
  6. 6 Na Em i tingting planti, bilong wanem, ol i no gat bilip. Na Em i go raun nabaut long ol vilis, na skulim ol manmeri.
  7. 7 ¶ Na Em i singautim i kam long Em dispela twelpela, na Em i stat long salim ol i go ausait long tupela tupela. Na Em i givim pawa long ol long bosim ol spirit i no klin.
  8. 8 Na Em i tok strong long ol long ol i no ken karim wanpela arapela samting long wokabaut bilong ol, stik wokabaut tasol. Ol i no ken karim liklik bek, o bret, o mani long paus mani bilong ol.
  9. 9 Tasol su bilong ol i mas ol slipa. Na ol i no ken putim tupela saket.
  10. 10 Na Em i tokim ol, Long wanem ples olgeta yupela i go insait long wanpela haus, stap long dispela hap inap long yupela lusim dispela ples.
  11. 11 Na husat man i no laik kisim yupela, o harim yupela, taim yupela i lusim dispela ples, seksekim das i lusim aninit bilong ol lek bilong yupela bilong wanpela testimoni i birua long ol. Tru tumas, Mi tokim yupela, Em bai stap orait moa long Sodom na Gomora long de bilong kot, moa long dispela biktaun.
  12. 12 Na ol i go ausait, na autim tok long ol man i mas tanim bel.
  13. 13 Na ol i rausim planti spirit nogut, na makim wantaim wel planti husat i sik, na oraitim ol.
  14. 14 ¶ Na king Herot i harim stori long Em. (Long wanem, nem bilong Em i go nabaut ausait.) Na em i tok, Long Jon dispela Baptist i kirap bek long dai, na olsem na ol strongpela wok i soim ol yet insait long Em.
  15. 15 Ol arapela i tok, Long dispela em Ilaias. Na ol arapela i tok, Long dispela em wanpela profet, o olsem wanpela bilong ol profet.
  16. 16 Tasol taim Herot i harim long en, em i tok, Dispela em Jon, husat mi bin rausim het bilong em. Em i kirap bek long dai.
  17. 17 Long wanem, Herot em yet i bin salim tok i go ausait na holimpas Jon, na pasim em insait long kalabus bilong tingim Herodias, meri bilong brata bilong em Filip. Long wanem, em i bin maritim em.
  18. 18 Long wanem, Jon i bin tokim Herot, Em i no orait long lo long yu ken kisim meri bilong brata bilong yu.
  19. 19 Olsem na Herodias i gat wanpela kros i birua long em, na em i gat laik long kilim em. Tasol em i no inap.
  20. 20 Long wanem, Herot i pret long Jon, taim em save long em i wanpela stretpela man na holi, na em i lukluk long em. Na taim em i harim em, em i mekim planti samting, na harim em wantaim amamas.
  21. 21 Na taim wanpela fit de i kam, long Herot, long de bilong tingim de mama i karim em, i wokim wanpela apinun kaikai i go long ol bikman bilong em, ol kepten i antap, na ol nambawan bikman bilong Galili.
  22. 22 Na taim pikinini meri bilong dispela Herodias i kam insait, na danis, na amamasim bel bilong Herot na ol husat i sindaun wantaim em, king i tokim dispela yangpela meri, Askim long mi wanem samting yu laikim, na mi bai givim dispela long yu.
  23. 23 Na em i wokim strongpela promis i go long em, Wanem samting yu bai askim long mi, mi bai givim dispela long yu, inap long namba tu hap bilong kingdom bilong mi.
  24. 24 Na meri i go ausait, na tokim mama bilong em, Mi bai askim wanem samting? Na em i tok, Het bilong Jon dispela Baptist.
  25. 25 Na em i kam insait kwiktaim, wantaim pasin bilong hariap, i go long king, na askim, i spik, Mi gat laik long yu givim mi bambai, long wanpela bikpela dis, het bilong Jon dispela Baptist.
  26. 26 Na king i sori planti moa yet. Tasol bilong tingim strongpela promis bilong em, na bilong tingim ol husat i sindaun wantaim em, em i no inap tok nogat olgeta long em.
  27. 27 Na wantu king i salim wanpela man bilong mekim man i dai, na tok strong long bringim het bilong em. Na em i go na rausim het bilong em long kalabus,
  28. 28 Na bringim het bilong em long wanpela bikpela dis, na givim dispela long yangpela meri. Na yangpela meri i givim dispela long mama bilong em.
  29. 29 Na taim ol disaipel bilong em i harim stori long dispela, ol i kam na kisim daibodi bilong em, na slipim insait long matmat.
  30. 30 ¶ Na ol aposel i bungim ol yet wantaim i go long Jisas, na toksave long Em long olgeta samting, wanem samting ol i bin mekim, na wanem samting ol i bin skulim ol manmeri wantaim.
  31. 31 Na Em i tokim ol, Yupela kam stap yupela yet i go long ples i no gat man, na malolo liklik. Long wanem, i gat planti husat i kam na go, na ol i no gat taim malolo liklik inap long ol i ken kaikai.
  32. 32 Na ol i lusim dispela hap i go long ples i no gat man long wanpela sip ol yet.
  33. 33 Na ol manmeri i lukim ol i lusim dispela hap, na planti i save long Em, na ran long lek i go long dispela hap ausait long olgeta biktaun, na kam pastaim long ol, na kam bung wantaim i go long Em.
  34. 34 Na Jisas, taim Em i kam ausait, i lukim planti manmeri, na pasin sori i muvim bel bilong Em i go long ol, bilong wanem, ol i olsem ol sipsip i no gat wasman. Na Em i stat long skulim ol long planti samting.
  35. 35 Na taim de i klostu long pinis nau, ol disaipel bilong Em i kam long Em, na tok, Dispela em i ples i no gat man, na nau taim em i go pinis tru.
  36. 36 Salim ol i go, inap long ol i ken go long hap raun nabaut, na long ol vilis, na baim bret bilong ol yet. Long wanem, ol i no gat wanpela samting bilong kaikai.
  37. 37 Na Em i bekim na tokim ol, Yupela givim ol bilong kaikai. Na ol i tokim Em, Mipela bai go na baim bret long 200 peni, na givim ol bilong kaikai?
  38. 38 Na Em i tokim ol, Yupela i gat hamas hap bret? Go na luksave. Na taim ol i save, ol i tok, Faipela, na tupela pis.
  39. 39 Na Em i tok strong long ol long mekim olgeta manmeri sindaun long ol lain bung antap long grinpela gras.
  40. 40 Na ol i sindaun long ol gutpela lain, long ol 100, na long ol 50.
  41. 41 Na taim Em i bin kisim dispela faipela hap bret na tupela pis, Em i lukluk i go antap long heven, na blesim, na brukim ol hap bret, na givim ol long ol disaipel bilong Em bilong putim long ai bilong ol. Na dispela tupela pis Em i brukim namel long ol olgeta.
  42. 42 Na ol olgeta i bin kaikai, na ol i pulap.
  43. 43 Na ol i bungim twelpela basket i pulap long ol hap hap kaikai, na bilong ol pis.
  44. 44 Na ol husat i bin kaikai long ol dispela hap bret em i klostu olsem 5,000 man.
  45. 45 ¶ Na kwiktaim Em i pulim ol disaipel bilong Em strong long go insait long sip, na long go long arapela sait paslain i go long Betsaida, taim Em i salim ol manmeri i go.
  46. 46 Na taim Em i bin salim ol i go, Em i lusim dispela hap i go long wanpela maunten bilong beten.
  47. 47 Na taim apinun tru i kam pinis, sip i stap insait long namel bilong biksi, na Em i stap Em wanpela long nambis.
  48. 48 Na Em i lukim ol i hatwok long pul. Long wanem, win i birua long ol. Na klostu long namba foa was bilong nait Em i kam long ol, taim Em i wokabaut antap long biksi, na Em i gat laik long wokabaut i abrusim ol.
  49. 49 Tasol taim ol i lukim Em i wokabaut antap long biksi, ol i ting olsem dispela i bin stap wanpela spirit, na ol i singaut.
  50. 50 Long wanem, ol olgeta i lukim Em, na ol i pilim wari. Na wantu Em i toktok wantaim ol, na tokim ol, Stap wantaim gutpela amamas. Em Mi. No ken pret.
  51. 51 Na Em i go antap i go long ol insait long sip. Na win i pinis. Na ol i kirap nogut tru strong tru insait long ol yet i go abrusim skel, na ol i tingting planti.
  52. 52 Long wanem, ol i no tingim na skelim dispela mirakel bilong ol hap bret. Long wanem, bel bilong ol i kamap olsem ston.
  53. 53 Na taim ol i bin go hapsait, ol i kam long hap graun bilong Genesaret, na wok long go klostu long nambis.
  54. 54 Na taim ol i kam ausait long sip, kwiktaim ol manmeri i save long Em,
  55. 55 Na ran namel long dispela hap graun olgeta raun nabaut, na stat long karim nabaut long ol bet ol dispela husat i sik, we ol i harim long Em i stap.
  56. 56 Na long wanem hap we Em i go, long ol vilis, o ol biktaun, o hap i no gat planti man, ol i slipim ol sikman long ol rot, na askim Em long daun pasin inap long ol i ken tasim, sapos em i olsem, arere bilong klos bilong Em tasol. Na hamas manmeri i tasim Em i kamap orait olgeta.

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗