로그인

전도서 10장 1757 Church Slavonic Elizabeth Bible

1757 Church Slavonic Elizabeth Bible · 교회 슬라브어 · 전도서 (Ecclesiastes) · 20절

🖍 이 판을 읽기 도구로 읽기 📖 무료성경
  1. 1 Мухи умершыя згнояют елеа сладость: честно малое мудрости паче славы велики безумия.
  2. 2 Сердце мудраго одесную его, сердце же безумнаго ошуюю его:
  3. 3 и в путь егда безумный идет, сердце его лишается, и яже помышляет, вся безумие суть.
  4. 4 Аще дух владеющаго взыдет на тя, места твоего не остави: яко изцеление утолит грехи велики.
  5. 5 Есть лукавство, еже видех под солнцем, аки невольно изыде от лица владеющаго:
  6. 6 вдан безумный в высоты велики, а богатии во смиренных сядут:
  7. 7 видех рабов на конех, и князей идущих яко рабов на земли.
  8. 8 Копаяй яму впадет в ню, и разоряющаго ограду угрызнет его змий.
  9. 9 Иземляй камение поболит от них, разсецаяй дрова беду приимет в них:
  10. 10 аще спадет сечиво, и сам лицем смятется: и силы укрепит, и изюбилие мужу мудрость.
  11. 11 Аще угрызнет змий не в шепте, и несть излишества обавающему.
  12. 12 Словеса уст премудраго благодать, устне же безумнаго потопят его:
  13. 13 начало словес уст его безумие, и последняя уст его прелесть лукава.
  14. 14 Безумный умножает словеса: не разуме человек, что бывшее и что будущее, что созади его, (и) кто возвестит ему?
  15. 15 Труд безумных озлобит их, иже не разуме ити во град.
  16. 16 Горе тебе, граде, в немже царь твой юн, и князи твои рано ядят.
  17. 17 Блаженна ты, земле, еяже царь твой сын свободных, и князи твои во время ядят в силе и не постыдятся.
  18. 18 В леностех смирится строп, и в празднестве рук прокаплет храмина.
  19. 19 Во смех творят хлеб и вино и елей, еже веселитися живущым: и сребра со смирением послушают всяческая.
  20. 20 И в совести убо твоей не клени царя, и в клети ложницы твоея не клени богатаго: яко птица небесная донесет глас твой, и имеяй криле возвестит слово твое.

1757 Church Slavonic Elizabeth Bible — getbible.net(CrossWire SWORD 모듈)에서 가져옴 · 라이선스: 공개 도메인 (Public Domain) · 출처 ↗