시편 15편 Vulgata Clementina
Vulgata Clementina · 라틴어 · 시편 (Psalms) · 10절
- 1 Tituli inscriptio, ipsi David. Conserva me, Domine, quoniam speravi in te.
- 2 Dixi Domino : Deus meus es tu, quoniam bonorum meorum non eges.
- 3 Sanctis qui sunt in terra ejus, mirificavit omnes voluntates meas in eis.
- 4 Multiplicatæ sunt infirmitates eorum : postea acceleraverunt. Non congregabo conventicula eorum de sanguinibus, nec memor ero nominum eorum per labia mea.
- 5 Dominus pars hæreditatis meæ, et calicis mei : tu es qui restitues hæreditatem meam mihi.
- 6 Funes ceciderunt mihi in præclaris ; etenim hæreditas mea præclara est mihi.
- 7 Benedicam Dominum qui tribuit mihi intellectum ; insuper et usque ad noctem increpuerunt me renes mei.
- 8 Providebam Dominum in conspectu meo semper : quoniam a dextris est mihi, ne commovear.
- 9 Propter hoc lætatum est cor meum, et exsultavit lingua mea ; insuper et caro mea requiescet in spe.
- 10 Quoniam non derelinques animam meam in inferno, nec dabis sanctum tuum videre corruptionem. Notas mihi fecisti vias vitæ ; adimplebis me lætitia cum vultu tuo : delectationes in dextera tua usque in finem.
- 📚 Vulgata Clementina 책 목록
- 개역개정판 (1998)로
- 개역한글판 (1961)로
- 표준새번역 (1993)로
- King James Version로
- KJV 와 나란히
- 🌐 다른 언어·판
Vulgata Clementina — getbible.net(CrossWire SWORD 모듈)에서 가져옴 · 라이선스: 공개 도메인 (Public Domain) · 출처 ↗