로그인

요한복음 3장 King Jems Pisin Baibel

King Jems Pisin Baibel · 톡피신어 · 요한복음 (John) · 36절

🖍 이 판을 읽기 도구로 읽기 📖 무료성경
  1. 1 ¶ I gat wanpela man bilong ol Farisi i stap, nem bilong em em Nikodimas, wanpela hetman bilong ol Ju.
  2. 2 Em yet i kam long Jisas long nait, na tokim em, Rabai, mipela i save long yu wanpela tisa i kam long God. Long wanem, i no gat man i ken wokim ol dispela mirakel yu wokim, sapos God i no stap wantaim em.
  3. 3 Jisas i bekim na tokim em, Tru tumas, tru tumas, mi tokim yu, Sapos wanpela man i no kamap nupela gen, em i no inap lukim kingdom bilong God.
  4. 4 Nikodimas i tokim em, Olsem wanem mama i ken karim wanpela man taim em i lapun? Em i inap long go namba tu taim insait long bel bilong mama bilong em, na mama i ken karim em?
  5. 5 Jisas i bekim tok, Tru tumas, tru tumas, mi tokim yu, sapos wanpela man i no kamap nupela long wara na long Spirit, em i no inap go insait long kingdom bilong God.
  6. 6 Dispela samting bodi i karim em bodi. Na dispela samting Spirit i karim em spirit.
  7. 7 No ken tingting planti long mi tokim yu, Yupela i mas kamap nupela gen.
  8. 8 Win i ran we em i laik, na yu harim nois bilong en, tasol yu no inap save long em i kam we, na em i go we. Olsem tasol em olgeta wan wan husat i kamap nupela long Spirit.
  9. 9 Nikodimas i bekim na tokim em, Ol dispela samting i ken stap olsem wanem?
  10. 10 Jisas i bekim na tokim em, Yu wanpela tisa long Isrel, na ating i yes long yu no save long ol dispela samting?
  11. 11 Tru tumas, tru tumas, mi tokim yu, mipela i toktok long dispela samting mipela i save, na tokaut klia long dispela mipela i bin lukim. Na yupela i no kisim witnes bilong mipela.
  12. 12 Sapos mi bin tokim yupela long ol samting bilong dispela graun, na yupela i no bilip, yupela bai bilip olsem wanem, sapos mi tokim yupela long ol samting bilong heven?
  13. 13 Na i no gat man i bin go antap long heven, em husat i kam daun long heven tasol, yes, Pikinini Man bilong man husat i stap long heven.
  14. 14 Na olsem Moses i litimapim snek long ples i no gat man, yes, olsem tasol ol i mas litimapim Pikinini Man bilong man.
  15. 15 Inap long husat man i bilip long em i no ken lus olgeta, tasol i gat laip i stap gut oltaim oltaim.
  16. 16 Long wanem, God i laikim tru ol manmeri bilong dispela graun olsem, inap long em i givim dispela wanpela Pikinini Man tasol em i kamapim, long husat man i bilip long em i no ken lus olgeta, tasol em i gat laip i stap gut oltaim oltaim.
  17. 17 Long wanem, God i no salim Pikinini Man bilong em long dispela graun long mekim ol manmeri bilong dispela graun i lus long kot, tasol long em i ken kisim bek ol manmeri bilong dispela graun long wok bilong em.
  18. 18 Em husat i bilip long em i no lus long kot. Tasol em husat i no bilip em i lus pinis long kot, bilong wanem, em i no bin bilip long nem bilong dispela wanpela Pikinini Man bilong God tasol God i kamapim.
  19. 19 Na dispela em i as bilong ol man i lus long kot, long lait i kam long dispela graun, na ol man i laikim tru tudak mobeta long lait, bilong wanem, ol wok bilong ol i nogut.
  20. 20 Long wanem, olgeta wan wan husat i mekim pasin nogut i hetim lait, na tu em i no kam long lait, nogut lait i ken stretim ol wok bilong em.
  21. 21 Tasol em husat i mekim pasin i tru i kam long lait, inap long ol wok bilong em i ken kamap ples klia, long em i wokim ol insait long God.
  22. 22 ¶ Bihain long ol dispela samting Jisas i kam na ol disaipel bilong em insait long hap bilong Judia. Na long dispela hap em i stap yet wantaim ol, na givim baptais.
  23. 23 Na Jon tu i givim baptais long Inon klostu long Selim, bilong wanem, i gat planti wara long dispela hap. Na ol i kam, na kisim baptais.
  24. 24 Long wanem, ol i no bin tromoi Jon long kalabus yet.
  25. 25 Nau i gat askim i kirap namel long sampela bilong ol disaipel bilong Jon na ol Ju long sait bilong klinim.
  26. 26 Na ol i kam long Jon, na tokim em, Rabai, em husat i stap wantaim yu hapsait long Jordan, long husat yu stap witnes, lukim, em yet i givim baptais, na olgeta man i kam long em.
  27. 27 Jon i bekim na tok, Wanpela man i no inap kisim wanpela samting, sapos God i no givim em dispela i kam long heven.
  28. 28 Yupela yupela yet i stap witnes long mi, long mi tok, Mi no Kraist, tasol long God i salim mi i kam pas long em.
  29. 29 Em husat i gat meri i laik marit em man i laik marit. Tasol pren bilong man i laik marit, husat i sanap na harim em, i wokim bikpela amamas tru, bilong wanem, em i harim nek bilong man i laik marit. Olsem na dispela amamas tru bilong mi em inap pinis.
  30. 30 Em i mas go antap, tasol mi mas go daun.
  31. 31 Em husat i kam long antap em i antap olgeta. Em husat i bilong dispela graun em i bilong dispela graun, na i toktok long dispela graun. Em husat i kam long heven em i antap long olgeta samting.
  32. 32 Na wanem samting em i bin lukim na harim, dispela em i tokaut klia long en. Na i no gat man i kisim testimoni bilong em.
  33. 33 Em husat i bin kisim testimoni bilong em i bin putim long mak bilong em long God em i trupela.
  34. 34 Long wanem, em husat God i bin salim i toktok long ol tok bilong God. Long wanem, God i no givim Spirit long em long hap skel tasol.
  35. 35 Papa i laikim tru Pikinini Man, na em i bin givim olgeta samting i go long han bilong em.
  36. 36 Em husat i bilip long Pikinini Man i gat laip i stap gut oltaim oltaim. Na em husat i no bilip long Pikinini Man bai i no inap lukim laip, tasol belhat tru bilong God i stap antap long em.

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗