요한복음 17장 King Jems Pisin Baibel

1. 1 ¶ Ol dispela toktok Jisas i tok, na litimapim tupela ai bilong em i go long heven, na tok, Papa, dispela aua i kam pinis. Givim glori long Pikinini Man bilong yu, inap long Pikinini Man bilong yu tu i ken givim glori long yu.
2. 2 Olsem yu bin givim em pawa long bosim olgeta bodi, inap long em i ken givim laip i stap gut oltaim oltaim long hamas man yu bin givim em.
3. 3 Na dispela em i laip i stap gut oltaim oltaim, long ol i ken save long yu, dispela wanpela God tru tasol, na Jisas Kraist, husat yu bin salim.
4. 4 Mi bin givim glori long yu long dispela graun. Mi bin pinisim dispela wok yu givim mi long mekim.
5. 5 Na nau, O Papa, yu givim glori long mi wantaim yu yet wantaim dispela glori mi bin gat wantaim yu bipo long dispela graun i stap.
6. 6 ¶ Mi bin mekim nem bilong yu i kamap ples klia long ol man husat yu givim mi ausait long dispela graun. Ol i bilong yu, na yu givim ol long mi. Na ol i bin holimpas tok bilong yu.
7. 7 Nau ol i bin save long olgeta wanem samting yu bin givim long mi i kam long yu.
8. 8 Long wanem, mi bin givim long ol ol dispela toktok yu givim mi. Na ol i bin kisim ol, na ol i bin save tru tumas long mi kam ausait long yu, na ol i bin bilip long yu bin salim mi.
9. 9 Mi beten long ol. Mi no beten long ol manmeri bilong dispela graun, tasol long ol husat yu bin givim mi. Long wanem, ol i bilong yu.
10. 10 Na olgeta bilong mi i bilong yu, na bilong yu i bilong mi. Na mi kisim glori long ol.
11. 11 ¶ Na nau mi no stap moa long dispela graun, tasol ol dispela i stap long dispela graun, na mi kam long yu. Holi Papa, holimpas, long nem bilong yu yet, ol dispela husat yu bin givim mi, inap long ol i ken stap wanpela, olsem yumi stap.
12. 12 Taim mi stap wantaim ol long dispela graun, mi lukautim ol long nem bilong yu. Ol dispela husat yu givim long mi mi bin lukautim, na i no gat wanpela bilong ol i lus, pikinini man bilong bagarap olgeta long hel tasol, inap long rait bilong God i ken kamap pinis.
13. 13 Na nau mi kam long yu. Na ol dispela samting mi toktok taim mi stap long dispela graun, inap long ol i ken gat amamas tru bilong mi i kamap pinis insait long ol yet.
14. 14 Mi bin givim tok bilong yu long ol. Na ol manmeri bilong dispela graun i bin hetim ol, bilong wanem, ol i no bilong dispela graun, yes, olsem mi no bilong dispela graun.
15. 15 Mi no beten long yu mas tekewe ol ausait long dispela graun, tasol long yu mas pasim ol long pasin nogut.
16. 16 Ol i no bilong dispela graun, yes, olsem mi no bilong dispela graun.
17. 17 ¶ Mekim ol i kamap holi long tok tru bilong yu. Tok bilong yu i tru.
18. 18 Olsem yu bin salim mi long dispela graun, yes, olsem tasol mi tu i bin salim ol long dispela graun.
19. 19 Na bilong tingim ol mi mekim mi yet long kamap holi, inap long ol tu i ken kamap holi long tok tru.
20. 20 ¶ Na tu mi no beten long ol dispela tasol, tasol long ol tu husat bai bilip long mi long tok bilong ol,
21. 21 Inap long ol olgeta i ken stap wanpela. Olsem yu, Papa, i stap insait long mi, na mi insait long yu, long ol tu i ken stap wanpela insait long yumi. Inap long ol man bilong dispela graun i ken bilip long yu bin salim mi.
22. 22 Na dispela glori yu givim mi mi bin givim ol. Inap long ol i ken stap wanpela, yes, olsem yumi stap wanpela.
23. 23 Mi insait long ol, na yu insait long mi, inap long ol i ken kamap inap tru insait long wanpela, na inap long ol manmeri bilong dispela graun i ken save long yu bin salim mi, na yu bin laikim ol tru, olsem yu bin laikim mi tru.
24. 24 ¶ Papa, mi gat laik long ol tu, husat yu bin givim mi, i ken stap wantaim mi we mi stap, inap long ol i ken lukim glori bilong mi, dispela yu bin givim mi. Long wanem, yu laikim mi tru bipo yu slipim ol as ston bilong dispela graun.
25. 25 O stretpela Papa, ol man bilong dispela graun i no bin save long yu. Tasol mi bin save long yu, na ol dispela i bin save long yu bin salim mi.
26. 26 Na mi bin tokaut long ol long nem bilong yu, na mi bai tokaut long en, inap long dispela laikim tru we yu bin laikim mi tru long en i ken stap insait long ol, na mi insait long ol.

• 📚 King Jems Pisin Baibel 책 목록
• 개역개정판 (1998)로
• 개역한글판 (1961)로
• 표준새번역 (1993)로
• King James Version로
• KJV 와 나란히
• 🌐 다른 언어·판

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗