에스더 1장 King Jems Pisin Baibel

King Jems Pisin Baibel · 톡피신어 · 에스더 (Esther) · 22절

언어 판 책 장 대역 (나란히) 바로 가기

1 ¶ Nau em i kamap olsem long ol de bilong Ahasuerus, (dispela em i Ahasuerus husat i bosim kingdom, i stat long India, yes, i go inap long Itiopia, i bosim 127 provins,)
2 Long ol dispela de, taim king Ahasuerus i sindaun antap long sia king bilong kingdom bilong em, dispela i stap long haus king Susan,
3 Long namba tri yia bilong bosim kingdom bilong em, em i wokim wanpela bikpela kaikai i go long olgeta hetman bilong em na ol wokboi bilong em, ol man i gat pawa long Persia na Media, ol bikman na ol hetman bilong ol provins, husat i stap long ai bilong em,
4 Taim em i soim ol planti mani samting bilong kingdom bilong em i gat glori, na ona bilong nambawan biknem tru bilong em planti de, yes, 180 de.
5 Na taim ol dispela de i pinis, king i wokim wanpela bikpela kaikai i go long olgeta manmeri husat i stap insait long haus king Susan, ol bikman na man nating wantaim, sevenpela de, long ples op bilong gaden bilong haus king bilong king,
6 We ol waitpela, grinpela, na blupela samting i hangamap, dispela ol i pasim strong wantaim ol rop bilong laplap i naispela tru na purpelpela long ol ring silva na ol pos marbel. Ol bet i bilong gol na silva, antap long wanpela plua ston i retpela, na blupela, na waitpela, na blakpela, marbel.
7 Na ol i givim ol dring long ol long ol jak gol, (ol jak i stap kain kain, wanpela long narapela,) na wain bilong king i planti moa yet, bilong bihainim sindaun bilong king.
8 Na pasin bilong dring i bilong bihainim lo, i no gat wanpela i pulim ol strong. Long wanem, olsem tasol king i bin makim long olgeta ofisa bilong haus bilong em, inap long olgeta wan wan man i ken mekim samting bilong bihainim amamas bilong em.
9 Na tu kwin Vasti i wokim wanpela bikpela kaikai bilong ol meri insait long dispela haus king i bilong king Ahasuerus.
10 ¶ Long namba seven de, taim bel bilong king i amamas wantaim wain, em i tok strong long Mehuman, Bista, Harbona, Bikta, na Abakta, Setar, na Karkas, dispela sevenpela man bilong bosim ol rum husat i wokim wok wokboi long pes bilong king Ahasuerus,
11 Long bringim kwin Vasti long ai long king wantaim hat kwin, bilong soim ol manmeri na ol hetman naispela pes bilong em. Long wanem, meri i naispela long lukluk long em.
12 Tasol kwin Vasti i tok nogat long kam long tok strong bilong king long han bilong ol man bilong em bilong bosim ol rum. Olsem na king i belhat nogut tru, na belhat bilong em i kuk insait long em.
13 Nau king i tokim ol saveman, husat i save long ol taim, (long wanem, olsem tasol em i pasin bilong king long olgeta husat i save long lo na kot,
14 Na klostu stret long em em Karsena, Setar, Admata, Tarsis, Meres, Marsena, na Memukan i stap, dispela sevenpela hetman bilong Persia na Media, husat i lukim pes bilong king, na husat i sindaun namba wan long kingdom,)
15 Yumi bai mekim wanem long kwin Vasti bilong bihainim lo? Bilong wanem, em i no bin bihainim tok strong bilong king Ahasuerus i kam long han bilong ol man bilong bosim ol rum.
16 Na Memukan i bekim tok long ai bilong king na ol hetman, Kwin Vasti i no bin wokim rong long king wanpela tasol, tasol long olgeta hetman tu, na long olgeta manmeri husat i stap long olgeta provins bilong king Ahasuerus.
17 Long wanem, dispela samting kwin i wokim bai kam ausait i go long olgeta meri, inap long ol bai tingim ol man bilong ol olsem ol i samting nating long ol ai bilong ol, taim ol man bai givim dispela ripot, King Ahasuerus i tok strong long kwin Vasti long ol i ken bringim em long ai bilong em, tasol em i no kam.
18 Wankain olsem ol bikmeri bilong Persia na Media bai toktok long dispela de i go long olgeta hetman bilong king, husat i bin harim samting kwin i wokim. Olsem tasol tumas bikpela sem na belhat tru bai kirap.
19 Sapos em i amamasim bel bilong king, larim wanpela tok strong bilong king i kam long maus bilong em i go ausait, na larim ol i raitim dispela namel long ol lo bilong ol lain Persia na ol lain Media, inap long i no gat man i ken senisim, Long Vasti i no ken kam moa long ai bilong king Ahasuerus. Na larim king i givim haus kwin na namba bilong em i go long narapela husat i winim em.
20 Na taim strongpela tokaut bilong king, dispela em bai mekim, bai kamap ples klia long olgeta hap bilong kingdom bilong em, (long wanem, em i bikpela,) olgeta maritmeri bai givim ona long ol man bilong ol, bikman na man nating wantaim.
21 Na dispela toktok i amamasim bel bilong king na ol hetman. Na king i mekim bilong bihainim tok bilong Memukan.
22 Long wanem, em i salim ol pas i go long olgeta provins bilong king, i go long olgeta wan wan provins bilong bihainim samting em i rait long en, na i go long olgeta wan wan lain manmeri i bihainim tok ples bilong ol, inap long olgeta wan wan man i ken bosim haus bilong em yet, na inap long ol i ken mekim dispela i kamap ples klia bilong bihainim tok ples bilong olgeta wan wan lain.

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗