시편 146편 King Jems Pisin Baibel
King Jems Pisin Baibel · 톡피신어 · 시편 (Psalms) · 10절
- 1 ¶ Yupela i mas litimapim nem bilong BIKPELA. O tewel bilong mi, Yu mas litimapim nem bilong BIKPELA.
- 2 Taim mi stap laip, bai mi litimapim nem bilong BIKPELA. Taim mi gat liklik laip i stap yet, bai mi singim ol song i litimapim nem bilong God bilong mi.
- 3 Yu no ken putim bilip bilong yu long ol hetman o long pikinini man bilong man. Ol i no inap helpim.
- 4 Win bilong em i lusim em, na em i go bek long graun bilong en. Long dispela de yet ol tingting bilong em i dai pinis.
- 5 ¶ Amamas i stap long man God bilong Jekop em helpim bilong em. Na samting em i wetim em i stap long BIKPELA, God bilong em.
- 6 Em i bin wokim heven, na dispela graun, na solwara, na olgeta samting i stap long en. Em i save lukautim tok tru oltaim oltaim.
- 7 Em i save mekim stretpela kot bilong ol man i karim hevi. Em i save givim kaikai long ol man i hangre. BIKPELA i save lusim ol kalabusman long kalabus.
- 8 BIKPELA i save opim ol ai bilong ol aipas. BIKPELA i save kirapim ol man i lindaun. BIKPELA i save laikim tru ol stretpela man.
- 9 BIKPELA i save lukautim i stap ol man bilong longwe ples. Em i save helpim ol pikinini i no gat papa na ol meri man bilong ol i dai pinis. Tasol Em i save tanim kranki rot bilong ol man i nogut tru.
- 10 BIKPELA bai bosim kingdom oltaim oltaim. Yes, O Saion, God bilong Yu bai bosim kingdom inap long taim bilong olgeta lain manmeri i kamap bihain. Yupela i mas litimapim nem bilong BIKPELA.
- 📚 King Jems Pisin Baibel 책 목록
- 개역개정판 (1998)로
- 개역한글판 (1961)로
- 표준새번역 (1993)로
- King James Version로
- KJV 와 나란히
- 🌐 다른 언어·판
King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗