로그인

사사기 13장 King Jems Pisin Baibel

King Jems Pisin Baibel · 톡피신어 · 사사기 (Judges) · 25절

🖍 이 판을 읽기 도구로 읽기 📖 무료성경
  1. 1 ¶ Na ol pikinini bilong Isrel i wokim pasin nogut gen long ai bilong BIKPELA. Na BIKPELA i givim ol i go long han bilong ol Filistin 40 yia.
  2. 2 Na i gat i stap wanpela man Sora, bilong famili bilong ol lain Dan, husat nem bilong em em Manoa. Na meri bilong em em i no inap long karim pikinini, na em i no karim.
  3. 3 Na ensel bilong BIKPELA i kamap ples klia long meri, na tokim em, Lukim nau, yu stap meri i no inap long karim pikinini, na yu no karim. Tasol yu bai kisim bel, na karim wanpela pikinini man.
  4. 4 Olsem na nau lukaut gut, mi askim yu plis, na no ken dring wain o strongpela dring, na no ken kaikai wanpela samting i no klin.
  5. 5 Long wanem, harim, yu bai kisim bel, na karim wanpela pikinini man. Na bai wanpela resa i no ken kam antap long het bilong em. Long wanem, dispela pikinini bai stap wanpela Nasarait i go long God i stat long bel bilong mama. Na em bai stat long kisim bek Isrel ausait long han bilong ol Filistin.
  6. 6 Nau meri i kam na tokim man bilong em, i spik, Wanpela man bilong God i kam long mi, na pes bilong em i olsem pes bilong wanpela ensel bilong God, samting bilong pretim mi nogut tru. Tasol mi no askim em long em i kam long we, na tu em i no tokim mi long nem bilong em.
  7. 7 Tasol em i tokim mi, Lukim, yu bai kisim bel, na karim wanpela pikinini man. Na nau yu no ken dring wain o strongpela dring, na tu yu no ken kaikai wanpela samting i no klin. Long wanem, dispela pikinini bai stap wanpela Nasarait i go long God i stat long bel bilong mama i go inap long de bilong dai bilong em.
  8. 8 ¶ Nau Manoa i mekim strongpela askim long BIKPELA, na tok, O Bikpela bilong mi, larim dispela man bilong God Yu bin salim i kam i ken kam gen long mipela, na skulim mipela long wanem samting mipela bai mekim long dispela pikinini meri bai karim.
  9. 9 Na God i harim long nek bilong Manoa. Na ensel bilong God i kam gen long meri taim em i sindaun long bikpela gaden. Tasol Manoa, man bilong em, i no stap wantaim em.
  10. 10 Na meri i go hariap, na ran, na soim man bilong em, na tokim em, Lukim, dispela man i bin kamap ples klia long mi, husat i kam long mi arapela de.
  11. 11 Na Manoa i kirap, na go bihainim meri bilong em, na kamap long dispela man, na tokim em, Ating yu dispela man husat i toktok i go long meri, a? Na em i tok, Em mi.
  12. 12 Na Manoa i tok, Nau larim ol toktok bilong yu i kamap olsem. Mipela bai lukautim dispela pikinini olsem wanem, na mipela bai mekim long em olsem wanem?
  13. 13 Na ensel bilong BIKPELA i tokim Manoa, Long olgeta samting mi tokim meri pinis, larim meri i lukaut gut long en.
  14. 14 Meri i no ken kaikai wanpela samting i kam long rop wain, na tu larim em i no ken dring wain o strongpela dring, o kaikai wanpela samting i no klin. Olgeta dispela mi tok strong long em pinis, larim em bihainim.
  15. 15 ¶ Na Manoa i tokim ensel bilong BIKPELA, Mi askim yu plis, larim mipela pasim yu, inap long mipela i bin redim wanpela pikinini meme bilong yu.
  16. 16 Na ensel bilong BIKPELA i tokim Manoa, Maski yu pasim mi, mi no inap kaikai long bret bilong yu. Na sapos yu laik ofaim wanpela ofa i kuk olgeta, yu mas ofaim dispela i go long BIKPELA. Long wanem, Manoa i no save long em i wanpela ensel bilong BIKPELA.
  17. 17 Na Manoa i tokim ensel bilong BIKPELA, Wanem nem bilong yu, inap long taim ol toktok bilong yu i kamap pinis, mipela i ken givim ona long yu?
  18. 18 Na ensel bilong BIKPELA i tokim em, Bilong wanem yu askim olsem bilong kisim nem bilong mi, taim yu luksave olsem em i samting hait?
  19. 19 Olsem na Manoa i kisim wanpela pikinini meme wantaim wanpela ofa bilong kaikai, na ofaim dispela antap long wanpela ston i go long BIKPELA. Na dispelaensel i bin mekim samting bilong winim tingting, na Manoa na meri bilong em i lukluk i stap.
  20. 20 Long wanem, em i kamap olsem, taim lait bilong paia i lusim alta i go antap i go long heven, long ensel bilong BIKPELA i go antap insait long lait bilong paia bilong alta. Na Manoa na meri bilong em i lukluk long dispela, na pundaun long ol pes bilong ol i go long graun.
  21. 21 Tasol ensel bilong BIKPELA i no bin kamap ples klia moa long Manoa na long meri bilong em. Nau Manoa i save long em i wanpela ensel bilong BIKPELA.
  22. 22 Na Manoa i tokim meri bilong em, Tru tumas, yumi bai dai, bilong wanem, yumi bin lukim God.
  23. 23 Tasol meri bilong em i tokim em, Sapos BIKPELA i gat amamas long kilim yumi i dai, Em i no inap kisim wanpela ofa i kuk olgeta na wanpela ofa bilong kaikai long ol han bilong yumi. Na tu, Em i no inap soim yumi olgeta dispela samting, o tu Em i no inap, long dispela kain taim, tokim yumi long ol kain samting olsem ol dispela.
  24. 24 ¶ Na meri i karim wanpela pikinini man, na kolim nem bilong em Samson. Na dispela pikinini i gro, na BIKPELA i blesim em.
  25. 25 Na Spirit bilong BIKPELA i stat long kirapim em long ol kain kain taim long kem bilong Dan namel long Sora and Esteol.

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗