사도행전 3장 King Jems Pisin Baibel

King Jems Pisin Baibel · 톡피신어 · 사도행전 (Acts) · 26절

언어 판 책 장 대역 (나란히) 바로 가기

1 ¶ Nau Pita na Jon i go antap wantaim insait long tempel long aua bilong prea, em i namba nain aua.
2 Na ol man i karim i kam wanpela man i lek nogut i stat long taim mama i karim em, husat ol i slipim olgeta wan wan de long dua bilong banis bilong tempel ol i kolim Naispela Tru, long askim sori mani long ol husat i go insait long tempel,
3 Husat taim em i lukim Pita na Jon i redi long go insait long tempel, em i askim long wanpela sori mani.
4 Na Pita, taim em i pasim strong tupela ai bilong em long em wantaim Jon, i tok, Lukluk long mitupela.
5 Na em was gut long ol, taim em i gat strongpela hop long em bai kisim samting long ol.
6 Nau Pita i tok, Silva na gol mi no gat, tasol kain samting mi gat bai mi givim yu. Long nem bilong Jisas Kraist bilong Nasaret kirap na wokabaut.
7 Na em i kisim em long han sut, na apim em. Na wantu tupela fut na ol skru bilong bun bilong fut bilong em i kisim strong.
8 Na taim em i kalap em i sanap, na wokabaut, na go wantaim ol insait long tempel, taim em i wokabaut, na kalap kalap, na litimapim nem bilong God.
9 Na olgeta manmeri i lukim em i wokabaut na litimapim nem bilong God.
10 Na ol i save long em i dispela man husat i save sindaun bilong kisim sori mani long dua bilong banis Naispela Tru bilong tempel. Na ol i pulap wantaim samting bilong winim tingting na samting bilong kirap nogut tru long dispela samting i bin kamap long em.
11 Na taim dispela lek nogut man husat i kamap orait pinis i holim Pita na Jon, olgeta manmeri i ran wantaim i go long ol long dispela veranda ol i kolim Bilong Solomon, na tingting planti tru.
12 ¶ Na taim Pita i lukim dispela, em bekim tok long ol manmeri, Yupela ol man bilong Isrel, bilong wanem yupela i tingting planti long dispela? O bilong wanem yupela i lukluk strong olsem long mitupela, olsem long mitupela i bin mekim dispela man wokabaut wantaim pawa o pasin holi bilong mitupela yet?
13 God bilong Ebraham, na bilong Aisak, na bilong Jekop, God bilong ol tumbuna papa bilong yumi, i bin givim glori long Pikinini Man bilong em Jisas, husat yupela i bin givim i go, na tok nogat long em long pes bilong Pailat, taim em i pasim tok long em yet bilong larim em i go fri.
14 Tasol yupela i tok nogat long dispela Man Holi na dispela Stretpela Man, na yupela i gat laik long Pailat i ken givim long yupela wanpela man bilong kilim man.
15 Na yupela i kilim Hetman bilong laip, husat God i bin kirapim long dai, we mipela em ol witnes long en.
16 Na nem bilong em, long bilip tru long nem bilong em, i bin mekim dispela man strong, husat yupela i lukim na save. Yes, dispela bilip tru i kam long em i bin givim em dispela strong i inap tru long pes bilong yupela olgeta.
17 Na nau, ol brata, mi save long yupela i no klia na mekim dispela, olsem ol hetman bilong yupela tu i bin mekim.
18 Tasol ol dispela samting, dispela God i bin soim bipo long maus bilong olgeta profet bilong em, inap long Kraist i mas karim pen, em i bin inapim olsem.
19 Olsem na yupela i mas tanim bel, na senisim bilip, inap long God i ken rausim i go ol sin bilong yupela, long taim ol taim bilong kisim strong gen bai kam long pes bilong Bikpela.
20 Na em bai salim Jisas Kraist, husat bipo ol i bin autim long yupela,
21 Husat heven mas kisim inap long ol taim bilong stretim bek bilong olgeta samting, dispela God i bin toktok long en long maus bilong olgeta profet holi bilong em i stat long taim dispela graun i stat i kam inap long nau.
22 Long wanem, Moses i tok tru long ol tumbuna papa, Wanpela profet Bikpela, God bilong yupela, bai kirapim long yupela long ol brata bilong yupela, i wankain olsem mi. Em bai yupela i harim long olgeta wanem samting em bai tokim yupela.
23 Na em bai kamap olsem, long olgeta wan wan tewel, husat i no laik harim dispela profet, ol bai bagarap olgeta long hap i namel long ol manmeri.
24 Yes, na olgeta profet i stat long Samyuel i kam, na ol dispela husat i kam bihain, olsem hamas man i bin toktok, i bin autim tok profet wankain olsem long ol dispela de.
25 Yupela i stap ol pikinini bilong ol profet, na bilong dispela kontrak God i wokim wantaim ol tumbuna papa bilong yumi, i spik go long Ebraham, Na long tumbuna pikinini bilong yu olgeta kandre bilong dispela graun bai kisim blesing.
26 Long yupela pastaim God, taim em i kirapim Pikinini Man bilong em Jisas, i salim em long blesim yupela, long tanim yupela olgeta wan wan i go lusim ol sin nogut bilong em.

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗