로그인

마가복음 16장 King Jems Pisin Baibel

King Jems Pisin Baibel · 톡피신어 · 마가복음 (Mark) · 20절

🖍 이 판을 읽기 도구로 읽기 📖 무료성경
  1. 1 ¶ Na taim sabat i pinis, Maria Magdala, na Maria, mama bilong Jems, na Salomi, i bin bringim ol switpela spais, inap long ol i ken kam na makim bodi bilong Em wantaim wel.
  2. 2 Na long moningtaim tru long namba wan de bilong wik, ol i kam long matmat long taim san i kam antap.
  3. 3 Na ol i toktok namel long ol yet, Husat bai tantanim dispela ston i go lusim dua bilong matmat long helpim yumi?
  4. 4 Na taim ol i lukluk, ol i luksave long wanpela i tantanim ston i go pinis. Long wanem, em i bikpela tru.
  5. 5 Na taim ol i go insait long matmat, ol i lukim wanpela yangpela man i sindaun long han sut sait, husat i werim klos long wanpela longpela waitpela klos. Na ol i pret.
  6. 6 Na em i tokim ol, No ken pret. Yupela i painim Jisas bilong Nasaret, husat ol i nilim long diwai kros. Em i kirap bek pinis. Em i no stap hia. Lukim ples we ol i bin slipim Em.
  7. 7 Tasol go long rot bilong yupela, tokim ol disaipel bilong Em na Pita long Em i go paslain long yupela long Galili. Long dispela hap yupela bai lukim Em, olsem Em i tokim yupela.
  8. 8 Na ol i go kwiktaim, na ranawe long matmat. Long wanem, ol i guria na ol i kirap nogut tru. Na tu ol i no tokim wanpela samting long wanpela man. Long wanem, ol i pret.
  9. 9 ¶ Nau taim Jisas i kirap bek pinis long moning tru bilong namba wan de bilong wik, Em i kamap ples klia long Maria Magdala pastaim, ausait long husat Em i bin rausim sevenpela spirit nogut.
  10. 10 Na em i go na tokim ol husat i bin stap wantaim Em, taim ol i soim sori na krai tru.
  11. 11 Na ol, taim ol i bin harim long Em i stap laip, na meri i bin lukim Em, ol i no bilip.
  12. 12 Bihain long dispela Em i kamap ples klia long tupela bilong ol na luk olsem narapela, taim ol i wokabaut, na go long hap i no gat planti man.
  13. 13 Na tupela i go na tokim ol arapela lain i stap yet. Na tu ol i no bilipim ol.
  14. 14 ¶ Bihain long en Em i kamap ples klia long dispela elevenpela taim ol i sindaun long kaikai, na givim sem long ol wantaim dispela pasin bilong i no gat bilip bilong ol na bikos bel bilong ol i hat tru, bilong wanem, ol i no bilipim ol husat i bin lukim Em bihain long Em i bin kirap bek.
  15. 15 Na Em i tokim ol, Yupela go long olgeta hap bilong dispela graun, na autim gutnius long olgeta wan wan samting God i wokim.
  16. 16 Em husat i bilip na kisim baptais, God bai kisim bek. Tasol em husat i no bilip bai lus olgeta long kot.
  17. 17 Na ol dispela mak bai bihainim ol husat i bilip. Long nem bilong Mi ol bai rausim ol spirit nogut. Ol bai toktok wantaim ol nupela tok ples.
  18. 18 Ol bai kisim ol snek i go antap. Na sapos ol i dringim wanpela samting bilong mekim man i dai, em bai i no inap bagarapim ol. Ol bai putim ol han antap long ol sikman, na ol bai kamap orait gen.
  19. 19 ¶ Olsem tasol nau bihain long Bikpela i bin toktok long ol, God i kisim Em i go antap long heven, na Em i sindaun long han sut bilong God.
  20. 20 Na ol i go ausait, na autim tok long olgeta wan wan hap, na Bikpela i wokim wantaim ol, na strongim dispela tok wantaim ol mak i bihainim. Amen.

King Jems Pisin Baibel — getbible.net(CrossWire SWORD 모듈)에서 가져옴 · 라이선스: CC BY-NC-ND 4.0 (Creative Commons: BY-NC-ND 4.0) · 출처 ↗