로그인

아가 2장 1757 Church Slavonic Elizabeth Bible

1757 Church Slavonic Elizabeth Bible · 교회 슬라브어 · 아가 (Song of Songs) · 17절

🖍 이 판을 읽기 도구로 읽기 📖 무료성경
  1. 1 Аз цвет польный и крин удольный.
  2. 2 Якоже крин в тернии, тако искренняя моя посреде дщерей.
  3. 3 Яко яблонь посреде древес лесных, тако брат мой посреде сынов: под сень его восхотех и седох, и плод его сладок в гортани моем.
  4. 4 Введите мя в дом вина, вчините ко мне любовь:
  5. 5 утвердите мя в мирех, положите мя во яблоцех: яко уязвлена (есмь) любовию аз.
  6. 6 Шуйца его под главою моею, и десница его оымет мя.
  7. 7 Заклях вас, дщери Иерусалимли, в силах и крепостех села: аще возставите и возбудите любовь, дондеже восхощет.
  8. 8 Глас брата моего: се, той идет, скача на горы и прескача на холмы.
  9. 9 Подобен есть брат мой серне или младу еленю на горах вефильских. Се, сей стоит за стеною нашею, проглядаяй оконцами, приницаяй сквозе мрежи.
  10. 10 Отвещает брат мой и глаголет мне: востани, прииди, ближняя моя, добрая моя, голубице моя.
  11. 11 Яко се, зима прейде, дождь отиде, отиде себе:
  12. 12 цвети явишася на земли, время обрезания приспе, глас горлицы слышан в земли нашей:
  13. 13 смоквь изнесе цвет свой, виногради зреюще даша воню. Востани, прииди, ближняя моя, добрая моя, голубице моя, и прииди.
  14. 14 Ты, голубице моя, в покрове каменне, близ предстения: яви ми зрак твой, и услышан сотвори ми глас твой: яко глас твой сладок, и образ твой красен.
  15. 15 Имите нам лисы малыя, губящыя винограды: и виногради наши созревают.
  16. 16 Брат мой мне, и аз ему, пасый в кринах,
  17. 17 дондеже дхнет день, и двигнутся сени. Обратися, уподобися ты, брате мой, серне или младу еленю на горах юдолий.

1757 Church Slavonic Elizabeth Bible — getbible.net(CrossWire SWORD 모듈)에서 가져옴 · 라이선스: 공개 도메인 (Public Domain) · 출처 ↗