로그인

사사기 17장 1757 Church Slavonic Elizabeth Bible

1757 Church Slavonic Elizabeth Bible · 교회 슬라브어 · 사사기 (Judges) · 13절

🖍 이 판을 읽기 도구로 읽기 📖 무료성경
  1. 1 И бысть муж от горы Ефремли, и имя ему Миха:
  2. 2 и рече матери своей: тысяща и сто сребреников иже украдены у тебе, и заклинала мя еси и глаголала еси во ушы мои: се, сребро у мене, аз взях е. И рече мати его: благословен сын мой Господеви.
  3. 3 И отдаде тысящу и сто сребреников матери своей. И рече мати его: освящающи освятих сребро Господеви от руки моея, тебе сынови моему сотворити (кумир) изваян и слиян, и ныне отдам е тебе.
  4. 4 И отдаде сребро матери своей. И взя мати его двести сребреников и даде их среброделю, и сотвори тое (кумир) изваян и слиян: и бысть в дому Михи.
  5. 5 И дом Михин ему дом Божий. И сотвори ефуд и ферафин: и наполни руку единому от сынов своих, и бысть ему жрец.
  6. 6 В тыя же дни не бяше царя во Израили: кийждо муж, еже право видяшеся пред очима его, творяше.
  7. 7 И бысть юноша от Вифлеема Иудина и от рода племене Иудина, и сей левитин, и обиташе тамо:
  8. 8 и пойде сей муж от града Вифлеема Иудина обитати, идеже обрящет место: и прииде до горы Ефремли и даже до дому Михина, еже сотворити путь свой.
  9. 9 И рече ему Миха: откуду идеши? И рече ему левитин: аз есмь от Вифлеема Иудина, и иду обитати, идеже обрящу место.
  10. 10 И рече ему Миха: седи со мною и буди ми отец и жрец, и аз дам тебе сребреников десять в год и двои ризы, и яже на житие тебе.
  11. 11 И пойде левит, и нача обитати у мужа. И бысть юноша ему яко един от сынов его.
  12. 12 И наполни Миха руку левитину, и бысть ему юноша жрец, и бяше в дому Михи.
  13. 13 И рече Миха: ныне уведех, яко благосотворит мне Господь, яко бысть мне левитин жрец.

1757 Church Slavonic Elizabeth Bible — getbible.net(CrossWire SWORD 모듈)에서 가져옴 · 라이선스: 공개 도메인 (Public Domain) · 출처 ↗