시편 34편 Aleppo Codex
Aleppo Codex · 고대 히브리어 · 시편 (Psalms) · 23절
- 1 לדוד— בשנותו את-טעמו לפני אבימלך ויגרשהו וילך
- 2 אברכה את-יהוה בכל-עת תמיד תהלתו בפי
- 3 ביהוה תתהלל נפשי ישמעו ענוים וישמחו
- 4 גדלו ליהוה אתי ונרוממה שמו יחדו
- 5 דרשתי את-יהוה וענני ומכל-מגורותי הצילני
- 6 הביטו אליו ונהרו ופניהם אל-יחפרו
- 7 זה עני קרא ויהוה שמע ומכל-צרותיו הושיעו
- 8 חנה מלאך-יהוה סביב ליראיו ויחלצם
- 9 טעמו וראו כי-טוב יהוה אשרי הגבר יחסה-בו
- 10 יראו את-יהוה קדשיו כי-אין מחסור ליראיו
- 11 כפירים רשו ורעבו ודרשי יהוה לא-יחסרו כל-טוב
- 12 לכו-בנים שמעו-לי יראת יהוה אלמדכם
- 13 מי-האיש החפץ חיים אהב ימים לראות טוב
- 14 נצר לשונך מרע ושפתיך מדבר מרמה
- 15 סור מרע ועשה-טוב בקש שלום ורדפהו
- 16 עיני יהוה אל-צדיקים ואזניו אל-שועתם
- 17 פני יהוה בעשי רע להכרית מארץ זכרם
- 18 צעקו ויהוה שמע ומכל-צרותם הצילם
- 19 קרוב יהוה לנשברי-לב ואת-דכאי-רוח יושיע
- 20 רבות רעות צדיק ומכלם יצילנו יהוה
- 21 שמר כל-עצמותיו אחת מהנה לא נשברה
- 22 תמותת רשע רעה ושנאי צדיק יאשמו
- 23 פדה יהוה נפש עבדיו ולא יאשמו כל-החסים בו
Aleppo Codex — getbible.net(CrossWire SWORD 모듈)에서 가져옴 · 라이선스: 공개 도메인 (Public Domain) · 출처 ↗