나훔 1장 Aleppo Codex
Aleppo Codex · 고대 히브리어 · 나훔 (Nahum) · 14절
- 1 משא נינוה—ספר חזון נחום האלקשי
- 2 אל קנוא ונקם יהוה נקם יהוה ובעל חמה נקם יהוה לצריו ונוטר הוא לאיביו
- 3 יהוה ארך אפים וגדול (וגדל) כח ונקה לא ינקה יהוה בסופה ובשערה דרכו וענן אבק רגליו
- 4 גוער בים ויבשהו וכל הנהרות החריב אמלל בשן וכרמל ופרח לבנון אמלל
- 5 הרים רעשו ממנו והגבעות התמגגו ותשא הארץ מפניו ותבל וכל יושבי בה
- 6 לפני זעמו מי יעמוד ומי יקום בחרון אפו חמתו נתכה כאש והצרים נתצו ממנו
- 7 טוב יהוה למעוז ביום צרה וידע חסי בו
- 8 ובשטף עבר כלה יעשה מקומה ואיביו ירדף חשך
- 9 מה תחשבון אל יהוה—כלה הוא עשה לא תקום פעמים צרה
- 10 כי עד סירים סבכים וכסבאם סבואים אכלו—כקש יבש מלא
- 11 ממך יצא חשב על יהוה רעה—יעץ בליעל
- 12 כה אמר יהוה אם שלמים וכן רבים וכן נגוזו ועבר וענתך—לא אענך עוד
- 13 ועתה אשבר מטהו מעליך ומוסרתיך אנתק
- 14 וצוה עליך יהוה לא יזרע משמך עוד מבית אלהיך אכרית פסל ומסכה אשים קברך—כי קלות
Aleppo Codex — getbible.net(CrossWire SWORD 모듈)에서 가져옴 · 라이선스: 공개 도메인 (Public Domain) · 출처 ↗